الموقع الالكتروني واش كيتقام ب1000 درهم ولا 5000 درهم

 السلام عليكم ا الخوت
بغيت نتكلم على مسألة السيت واش كيتقام ب1000 درهم ولا 4000 درهم إلخ... و شنو هوما المسائل الي كيساهمو فتحديد الثمن دهاد الخدمة.


يقدر يكون كلامي فيه شي حاجات غالطين ولا نسيت شيحاجة و  المعلومات عندي تكون ناقصة ، و لكن انا كانتكلم على داكشي الي عارف أنا انطلاقا من المحيط ديالي.


و بغيت نهضر على هادشي حيت شفت بلي شي وحدين كيخدمو حاجة رخيصة كيتاهمو الناس الي كيخدمو بأثمنة فحال 4000 و 5000 درهم لفوق بلي هوما سراقين -_- و ماعجبنيش الحال حيت هادي تهمة باطلة ، و حيت كاين شي مسائل كيدخلو فكواليس تحديد الثمن ، الي ماخدمشي فشركة ولا ماعملشي مشروع ديالو ولا على الأقل خدم فالتجارة ولا الحانوت إلخ... ماغايعرفشي هاد التفاصيل.


كاين 3 أنواع ديال المهنيين (على حساب المعرفة المتواضعة ديالي). كاين :
• مقاولة شركة Agence ، تقدر تلقاها ف تيكنو بارك ولا كاريين فشي بلاصة أخرى
• Freelancer avec statut Auto-entrepreneur (formel)
• Freelancer sans statut Auto-entrepreneur (informel)


الجوج اللوالا كيتعتابرو مقاولات مسجلين عند الدولة و متبوعين بمجموعة ديال المصاريف و الضرائب، مع اختلاف أن فريلانس مقاول ذاتي، كيخلص فقط ضريبة بالنسبة 1% كل 3 اشهر على الأرباح ديالو ، و مور 5 سنين كيخلص الضريبة المهنية إلخ, و ممكن يكونو عندو مصاريف أخرى غير ضريبية فحال الكرا أو الانترنت أو أي شيء آخر. أما الوكالة فهي مقاولة كذلك و لكن عندها ضرائب متعددة فحال الضريبة على الشركات و الضريبة المهنية و الضريبة على القيمة المضافة إلخ... و الأجور و الضمان الاجتماعي و الكرا على حساب البلاصة و الما و الضو و التجهيزات و واحد العالم آخور ماغيحس بيه إلا الي خدم فشركة ولا قرى la comptabilité.


أما الفريلانس الي مامسجلش كمقاول ذاتي، يعني خدام فالنوار، عندو مصاريف قليلة، و مهني من شي ضرائب. و حتى هوما كاين الي عندو مصاريف كبيرة ، إما أنه كيعيل أسرة أو ظروف أخرى غايحتاج فيها يدخل الصرف. و كاين الي ماعندوش مصاريف كثيرة.


الإنسان ملي كيجي يحدد الثمن ديال منتوج أو خدمة، فهو كيحدد الثمن الي كيعاونو أنه يسترجع المصاريف ديال الإستثمار و مصاريف الخدمة و داكشي. و الي ماعندوش العلم فهادشي يمشي يريح شوية مع التجار و موالين الحوانت ولا يتعلم comptabilité... يمشي يثقف راسو فالمحاسبة و فالاقتصاد و التسيير باش يتعلم كيفاش كيتحدد الثمن. راه باش تحدد الثمن ماشي غير و أجي عطي الثمن. راه الثمن كيتضربو حساب على لاباز ديال شنو غاتصرف فالشركة ديالك و كلفة الخدمة ولا المنتوج عاد كاتشوف السوق.


و باش نشرح هاد المسائل ، غانعطي مثال بحاجة بسيطة فحالة إلا كانت الوكالة غادة تخدم بالوورد بريس و غاتخدم ب تيمبلات مصاوب ، و غاتشري من الخاريج (Namecheap Goddady Etc...) 


(كاين الي كيخدم ب ووردبريس ولكن كيصاوب التيم من 0، شوف شحال غادي يحسب فيه، حيت شحال دالو ديال الوقت، و شحال و هو مسمر قبالت بيسي خاشي عينيه... باش يصاوب شي حاجة جديدة، شحال من واحد عندو النظر نقص ولا عندو حساسية ديال الضو، ولا أمراض أخرى...)


كاين عدة خيارات على شنو طالب مني الكليان ! مثلا الكليان طالب سيت إيكوميرس، شنو غادي نحتاج ؟ إلا جيت نخدم غا سيت إيكوميرس شي حاجة رخيصة على حساب ما شفت شحال هادي قالك الكرياسيون ب1500 درهم !!!
غانحتاج ضومين ف نيم شيب (9.08 دولار) يعني قول 90 درهم للعام + الهوست ف هوست غاتور (هادشي إلا ماكانش عندي هوست مشترك و غادي نعمل هوست خاص فقط بالسيت حيت هو إيكوميرس) 42 دولار ، يعني بالدرهم 400 درهم للعام، غاتشريه ناقص ب60% على الثمن الحقيقي يعني فالتجديد يمكن أ سيدي تقاملك بشي 700 درهم ! و زيد السيرتيفيكا يمكن تلقاها باطل ولا تصاوبها نتا ولا تشريها بشي 180 درهم للعام إلا بقيت عاقل
التيمبلات على حساب، يمكن تلقاها باطل ولا رخيصة بشي 30 ولا 40 دولار الله أعلم ولا بغيتي شيحاجة سبيسيال ب70 دولار ولا 100 لفوق يعني أ سيدي من 300 درهم لفوق ...
زيد عليها بلوجينز، يعني تقدر تلقى شي حاجة باطل وإلا بغيتي شي حاجة سبيسيال تخلص عليها 10 دولار قل منها ولا كثر على حساب شنو غاتختار و للعام 
زيد عليها الريفيرونسمو Référencement
زيد عليها بشحال غاتقاملك الصفحات ديال الموقع (Pages et articles)، حيت داكشي الي غاتكتب نتا ماشي كوبي كولي، غاتتعذب باش تألف ولا وخى كوبي كولي، غاتبدل فيها شي حاجات -_- 
آجي ؟ و البروداكت باش نليستيه فالووكوميرس بشحال غادي يحسب عليه ؟ 
واش نسيت شي حاجة ناقصة ؟ الله أعلم، غانكون نسيت.
 مهم، حنا نشوفو " Coût de production sans autres frais" على حساب الاحتمال ديالي، و الناس الي قدامين فالضومين هما عارفين التفاصيل كتر.


Domain name : 9$
Host : 42$
Certificate SSL : 18$
Template : 30$
One Plugin -_- : 10$
Référencement : (dépend les services de référencement) ???
Annonces (si possible) ???
Ecriture et mise en forme des pages ???
List des produits ????
Email professionnel ??????
-----------------------
Montant total : 109$ + autres frais (En DH : 109$ × 9.5DH = 1035.50 DH + autres frais...)
و ضربو الحساب شحال غادي تجي...
زيد عليها Frais divers
Eau et Electricité + fournitures de bureau + Frais de téléphone et connexion "Fibre" Abonnement Entreprise + Honoraires "Comptable" + Salaire + CNSS et charges sociales + Loyer + Impôts et taxes + Amortissements de mobilier de bureau et matériel informatique + ...
فالغالب غاتكون التكاليف الشهرية ديال Frais divers ديال شركة ديال الخدمات كاتفوت 15000 آلف درهم شهريا،
و شحال ديال الكليان كاتعامل معاهم ف Service Après Vente
و شحال من كليان جديد كيطلبك تكريي ليه السيت ؟ 
يعني الفرق شحال غادي يبقالك ؟ ضربولا الحساب ...


من هادشي كامل، بغيت نوصل واحد الرسالة، بلي أنه : 
• ملي تشوف شي حد طلب 4000 ولا حتى 10000 درهم فالسيت، ماتقولش عليه نصاب ! حيت ما طلبو فحال هاد الأثمنة إلا و عندهم علاش... راه الناس ماكيلعبوش بالأثمنة غير على الربح ! راه بنادم مطيح سنانو فالضومين ، الي قرى و سهر الليالي و شحال ضرب ديال تمارة باش يخدم فهاد الضومين.
• الحاجة الي كاتضرب عليها تمارة و كاتخدمها بالنفس و الجودة، تستحق ثمن فالمستوى
• الكليان ماكيفهمش هاد الكواليس ديال التكاليف و داكشي وخا تعيا ما تخطب عليه، و لكن هادشي ماكيعنيش بلي ماكاينش كليان كيقلب على الجودة، وخى كاين بزاف ديال الكليان ماعندوش ذوق فني
• الضومين ولا صعيب : الشركات و الفريلانسرز خسوم يتأقلمو مع الأوضاع الحالية ، و لكن !!! خسهوم يتنظمو، ينوعو الخدمات و الأساليب باش يواجهو المنافسة، ماعرفتش واش عندهم إمكانية يخدمو مع كليان على برا، ماعرفتش واش عاملين نقابة ديالهم ، واش كاين شي إمكانية ديال تحالف وطني ولا جمعية وطنية الي من خلالها يكون تعاون بيناتهم فبعض المسائل، مثلا شركة تكلف فريلانسر يكمل شي خدمة مقابل ثمن، إلخ ... باش ينظمو الضومين و يرفعو من جودة الخدمات و الخدمة تكون بروفيسيونيل...
• الشركة الي باغة تبقى خسا تقلب على الإمكانيات ديال مواجهة المنافسة الكبيرة "بزاف"


هادشي وجهة النظر ديالي. الله يفرجها على الجميع و الله يوفق.